بقلم : نادية البسيونى
انت عارف يعنى إيه معنى الجنود
يعنى إيه قلبك شبه قلب الأسود
يعنى إيه أمك وابوك فى انتظارك بالشهور
وانت فوق الجبهه جسر من الجسور
يعنى ميت مليون قاموس
مايساعوش لحظة صمود
وانت طاير فى السما زى النسور
وانت صدرك عرض بحر من البحور
وانت متشبث بأرضك
وبجذور كل الجدود
يعنى نبضك فى العروق
نبض الشوارع والحوارى والبيوت
يعنى دمك فى الصخور يطرح ورود
يعنى مستقبل طفولة
يعنى حلم لكل صورة
جوة برواز البطولة
وانت بتضحى بشبابك وبحياتك
لاجل حرية بلادك
